GILUSAD sa Talisay City Police Station, Lunes sa hapon, Nobiyembre 26, ang “Motorcycle Wiper Patrolling” (MWP).

Kini aron pagdugang sa mga pulis nga mamahimong ma-angkasan niadtong mga naglakaw ug ang pagpatrolya sa nagkadaiya nga dapit sa syudad sa Talisay.

Gitug-an ni Police Major Gerald Ace Pelare, hepe sa TCPS nga usa kini sa ilang mga gihimo nga pag-intensify alang sa seguridad sa publiko, ilabi na ning naghinangat ang kasaulogan sa Pasko.

Diin ang mga tawo, wala ug tuo nga mamalit sa kinahanglanon sa maong okasyon sama sa pagpamalit og pang-regalo, pa-decorate ug mga pagkaon.

Gawas niini, adunay igong kwarta ang mga tawo tungod sa bonus nga maoy sagad humot sa mga criminal, ilabi na mga kawatan.

“Talisay City PNP braces for the Christmas season with its intensified Motorcycle Wiper Patrolling. Motorcylce Wiper Patrollers are now out in the different parts of Talisay City to ensure that the streets and establishments are safe and criminals lurking in the city are fended off,” pamahayag ni Pelare.

Wa itug-an sa Talisay Police kon pila ka mga pulis nga nag-motorsiklo ang naglangkob sa MWP, apan ang gipaneguro ni Pelare nga kon mas magkaduol ang Pasko, mas magkadaghan usab kini silang mga pulis diha sa kadalanan magbantay.

Gipasabot na sa ilang hepe, nga pagpakita kini nga 24 oras matag adlaw naglihok ang kapulisan sa dakbayan sa Talisay, aron masiguro ang kahusay ug kalinaw ug magsilbing warning na usab ngadto sa mga nagtinguha og dautan sa dakbayan.

Ang maong kalihukan sa kapulisan ang gipasalamatan ni Talisay City Mayor Gerald Anthony Gullas kay nakatabang kini nga kampante ang Talisaynon sa inadlaw nga mga gimbuhaton. (FMD)