NIPADALA og suwat imbitasyon ang kabomberuhan sa syudad sa Mandaue sa tag-iya sa balay diin nagsugod ang sunog sa Barangay Tipolo.

Matod ni SFO2 Edgar Vergara, fire investigator, wa pa silay ngalan sa giingong magtiayon nga nag-abang sa ikaduhang andana sa balay sa magtiayong Mariano ug Alma Conchas.

Giingon nga nasuta lang nga ang lalake nga nag-abang nagtrabaho isip security guard sa may City Time square.

Apan hangtud Sabado sa gabii, Hunyo 29, wa pa gihapon nipatim-aw ang giingong nag-abang nga magtiayon ug wa pay ngalan ang kabomberuhan sa duha.

“Ato sila i-invite kay aron ato gyud mahibaw-an. Kay naay moingon nga mga silingan nga naay nag-charge, naa say galuto, naa sad gaingon nga nagkandila. But until now wa pa gani ta name sa mga couple nga nag-abang daw. Ato sayran kon naa ba gyud tinuod nag-abang,” saysay ni Vergara sa Superbalita Cebu.

Samtang gi-cordon ang balay diin nagsugod ang sunog alang sa pagpalawom pa sa imbestigasyon sa sunog nga niugdaw sa dul-an 500 ka balay.

Giduaw

Bisan kon magsugod na sa iyang tahas isip senador ang kaniadto Special Assistant to the President, Bong Go, nipasalig kini nga magpadayon iyang pagtabang ug pagbisita sa mga nasunugan sa mga suok sa nasod.

Si Go nibisita sa mga biktima sa sunog sa Barangay Tipolo, Dakbayan sa Mandaue niadtong Biyernes, Hunyo 28 sa Cebu International Convention Center (CICC) diin kasamtangan nga namuyo ang pipila sa mga biktima.

Lakip sa gitunol nga hinabang ni Go ang P2,000 nga cash assistance sa matag pamilya sa nasunogan, pagkaon, ug grocery packs.

Atol sa pakighinabi ni Go sa mga biktima, gipanawag usab niya ang mga mabdos nga inahan. (HBL, FMD)