MANAG-UYAB nga durugista ug usa ka estudyante ang nadakpan atol sa buy bust sa Sitio Crasher, Barangay Lawaan 3, dakbayan sa Talisay niadtong Sabado, Oktubre 19, alas 6:00 sa buntag.

Ang subject sa operasyon mao si Isidro Petiluna alyas Eddie, 47, molupyo sa maong dapit.

Nasikop usab ang kapuyo niini nga matod sa kapulisan partner usab ni Petiluna sa negusyo nga giilang si Maria Anna Empacis, 50 .

Matod ni Police Captain Mikhail Mallorca, deputy chief sa Talisay City Police Station, nga ang duha lumad nga taga Duljo Fatima sa dakbayan sa Sugbo.

Laing nasikop mao ang usa ka tinun-an pa nga si Michael Dave Batarilan, 19, nga giingong kauban nila ni Petiluna ug Empacis.

Matod ni Mallorca, nga una nga gi-monitor ang magkapuyo atol pa sa pamunoan sa kanhi hepe sa Talisay City.

Sa gihimo nga padayong surveillance, nasuta nga nagpadayon pa gihapon sa ilegal nga patigayon ang duha.

Mao kini hinungdan nga Sabado sa buntag, sa dihang nagpositibo, gihimo dayon nila ang operasyon, dugang ni Mallorca.

Nasakmitan sila og mobalor sa P136 mil nga balor sa gituohang shabu.

Gitug-an ni Konsehal Ledion Echavez sa Barangay Lawaan 3 nga bag-o lang namuyo ang manag-uyab sa ilang lugar.

Gihulagway sa mga silingan sa mga dinakpan nga bisan kon walay trabaho ang duha, giingon nga kalit lang nga nilambo ang pagpuyo sa mubo ra nga panahon.

Ang tulo ang anaa na sa detention cell Talisay City Police Station, nga gikatakda nga pasakaan og kaso karong Lunes, Oktubre 21.

Ang kapulisan sa Talisay nagpadayon karon sa ilang subsob nga operasyon batok sa gidiling drugas sa pagtuman sa mando sa ilang ulohan buhatan ug gubat batok sa drugas nga taudtaod nang gilusab ni Presidente Rodrigo Duterte.

Ang Talisay usa sa mga init sa negosyo sa druga apan giingong hinayhinay na kining niminos karon. (FMD)