NAIGO ang nawong sa usa ka mananagat human gitigbas sa silingan nga nanguhag isda sa iyang bungsod niadtong Sabado, Agusto 1, sa alas 5:00 sa hapon sa Barangay Poblacion, lungsod sa Tabuelan.

Si Antonio Inot, 50, minyo ug mananagat sa maong lugar maayong pagkatabas sa walang bahin sa iyang nawong.

Si Zosimo Moreño, 70, silingan ug mananagat usab, nadakpan sa kapulisan nga mirespondi.

Si Police Staff Sgt. Wesson Ramonida, sa Tabuelan Police Station nga nahinabi sa Superbalita Cebu nagkanayon nga ang biktima padulong unta kini nga manguhag isda sa iyang bungsod.

Apan sa pag-abot niya nasurprisa siya kay didto naman ang suspetsado sa sulod niini gipanguha ang mga Isda.

Sa iyang kalagot nagkakunprontasi sila sa suspetsado kinsa nagtubagtubag bisan og sayop niini.

Napungot ang biktima ug iyang gibunalbunalan sa dalang lipak nga kawayan ang suspetsado.

Ang suspetsado nisukol kay nagdala kinig sundang didto sa sulod sa bungsod nga gigamit niini pagtigbas sa mga isda nga makuha.

Samtang nagbunal ang biktima, nibawos sab ang suspetsado sa pagtigbas hinungdan sa pagka-igo sa walang nawong sa biktima ug maayong pagkatabas.

Kay duol ra ang police station, nakadagan ang biktima ug angayog abag sa kapulisan ug nadakpan ang suspek.

Ang biktima mipadayag nga iyang pasakaan og kasong frustrated homicide ang suspek. (GPL)