NAMATAY ang apohan samtang luwas ang iyang apo human sila gipang-anod sa kusog nga sulog sa dagat niadtong Sabado sa buntag, Mayo 9, sa Barangay Tindog, lungsod sa Medellin.

Si Rodito Puyos, 66, minyo, mananagat, dead-on-arrival (DOA) sa tambalanan, samtang naka-survive ang iyang apo nga si Claymark Algar, 20, ulitawo.

Si Police Corporal Rosano Queddeng sa Medellin Police Station nagkanayon nga alas 6:00 buntag ang duha nanagat ug ilang gikuha sa lawod ang 'bobo' (klase sa panagat) apan pagka alas 8:00 sa buntag dihang nahuman na sila ug mopauli na unta.

Apan kusog na kaayo ang sulog human nagpadulong sa taob niadtong higayuna ug sila nangaanod.

Dali silang nadala sa daplin ug gitabang ang apuhan sa mga rescuer ug gidala sa tambalanan apan DOA na kini. (GPL)