MANANANGGOT nag-ala “Superman” ni-dive gikan sa ibabaw sa punoan sa lubi, patay nang naabtan sa kapulisan sa Martes sa alas 5:30 sa hapon, Agusto 4, 2020 sa Sitio Immaculada, Barangay Nangka, lungsod sa Balamban.

Ang biktima giilang si Ildrid Hayag Dinawanao, 50, ulitawo, nagpuyo sa dapit.

Siya giingong niagi og nervous breakdown, matod ni Police Executive Master Sergeant Benedicto Bobilles, imbestigador sa Balamban Police Station nga nahinabi sa Superbalita Cebu.

Matod ni Bobilles, nga ang maguwang nga si Alfredo, nitug-an nga Martes pa sa buntag nisaka na si Ildrid sa lubi nga sanggutan nga gibana-banang dunay gitas-on nga 40 kapin ka tiil. Ang ubang mga silingan nisulti sab nga kaadlawon pa nisaka si Aldrin, unya nikanaog ug nibalik na usab pagsaka.

Si Alfredo nibutyag nga wa pay lockdown, nagsige nag saka kanaog sa sanggutan si Ildrid ug sa punoan sa mangga sa iyang manghod.

“ Naa daw tawo nga nangita niya buot daw siyang patyon mao nga mosaka siya sa sangutan o kahoy kon motukar ang nervous breakdown,” dugang ni Bobilles.

Si Alfredo nipadayag nga naanad na sila ni Ildrid kay usahay ilang panaugon, hayluog pagkaon, mokanaog ra.

Usahay, di manaog hinungdan nga molakaw nalang sila ug mosunod ra sa pagkanaog.

Sa wa pa kini niambak gihangyo usab nila nga mokanaog, apan mitubag nga “ayaw mog pagduol kay naay tawong nangita nako buot mopatay.”

Nabalaka sab ang kabanay nga kon ilang katkaton, magwala unya ug kuyaw na hinuon sa mo-rescue hinungdan nga ilang gipasagdan. (GPL)