GIHULAGWAY sa usa sa nahimong biktima nga reyna sa mangingilad kining usa ka 25 anyos nga babaye nga si Jamela Maluya Del Rosario, taga Barangay Dumlog, dakbayan sa Talisay.

Si Del Rosario nadakpan sa mga sakop sa Regional Anti Cyber Crime Unit (RACU)-7, niadtong Lunes sa hapon, Disyembre 2, sa usa ka money remitance center.

Sa gihimong entraptment operation sa RACU -7, nasikop si Del Rosario. Matud ni PCol.Marlo Castillo, Regional Chief sa Anti Cyber Crime Unit, nga dunay mga biktima sa usa ka online business nga kunohay nagnegosyo og ukay-ukay, apan dakong pangilad diay.

Dugang ni Castillo nga nagpakitabang sa ilang buhatan ang pipila ka mga biktima. Lakip niini mao ang tag-iya sa ID nga maoy gigamit ni Del Rosario.

Modus sa suspek ang pag-post sa social media sa iyang mga baligya nga mga ukay-ukay sa mas ubos nga presyo kon bulto ang paliton sa iyang kustomer.

Kon ang suspek ug ang biktima nagkasinabot na pinaagi sa private message sa pamaagi sa ilang pag-order ingon man unsaon pagbayad, kinahanglan ang usa ka kustomer mohatag una sa katunga o kompletong bayad sa iyang gi order.

Ipadala sa usa ka money remittance ang bayad ug gipasaligan nga kon na claim na mopahibalo gilayon ang maong suspek ug gipatuo nga masunod ang ilang gipang order. Apan mao na lay ilang nasayran nga sa higayon nga madawat na diyan ang kuwarta nga isip pasiuna nilang bayad, e-blocked usab sila sa suspek aron dili na kini maka-kontak kaniya.

Nahibaloan nila Castillo nga miabot na sa 16 ka mga tawo ang nangabiktima ni Del Rosario samtang dili mo ubos sa P20 mil tanan ang kwarta nga nakuha gikan sa iyang mga biktima.

Si Donna Mae Ponsica, 23, lumad nga taga Alcantara, usa sa mipasaka og reklamo miingon nga kuwatro mil pesos ang nabayad niya kang Del Rosario pinaagi sa money remitance center, apan miabot nalang ang hapit upat ka adlaw sukwahi sa ilang gikasabotan walay bisan usa ka ukay-ukay nga miabot.

Si Nelly Ross Taran Malanguis, hingkud ang edad, maoy tag-iya sa ID nga gigamit ni Del Rosario. Ingon ni Malanguis nga posibling nakuha ni Del Rosario ang iyang ID gikan sa iyang pitaka nga nahulog ug wala na igkita.

Mao na lay iyang nahibawo-an nga gigamit na diay kini sa pagpangilad hinungdan nga miadto ug mipahibawo gilayon siya ngadto sa RACU-7.

Kasong kalapasan Estafa/Swindling, Identity Theft of RA 10175 (Anti Cybercrime Prevention Act of 2012) ang ipasaka batok kaniya. (BBT)