DUHA ka mga lalake gipusil patay Biyernes sa hapon ug gabii, Hulyo 12, sa managlahing mga lugar sa Dakbayan sa Talisay.

Usa sa duha giingong fixer samtang ang usa gidudahang may kalambigitan sa illegal drugs.

Ang unang biktima giila nga si Julius Engbino, 43, taga lungsod sa Minglanilla, kinsa gipusil sa makadaghan nga higayon sa sitio Salvador, Barangay Tangke, syudad sa Talisay.

Nahitabo kini pasado ala una sa hapon.

Sa pakisusi sa kapulisan sa Siyudad sa Talisay, matod ni Police Major Orlando Carag, usa sa ilang gisusi sa motibo sa kremin mao ang personal nga bangi.

Kay nasuta nga si Engbino usa ka fixer alang niadtong buot mokuha og lisensya sa pagmaneho, ilabi na sa mga habal-habal driver.

Matod ni Carag nga daghan na kini og nakolektahan og kwarta, apan wa pa nakahatag sa mga gikinahanglang lisensya, kun nakapago og kwarta.

Laing gitan-aw nga motibo sa kremin ang posibleng pagkalambigit niini sa ilegal nga drugas.

Giingon nga kanunay si Engbino sa Barangay Tangke.

Matod ni Carag nga tulo ka mga lalakeng naka-motorsiklo ang nangita kang Engbino.

Sa dihang gitudloan sa nahimutangan, pipila ka minuto mao na lang nadunggan sa mga tawo ang mga buto sa armas. Daling nisibat ang mga mamumuno.

Namatay diha-diha si Engbino sa mga samad, lakip na sa ulo.

“Nangungulekta daw ito ng pera for licensing, parang fixer. Pero nadispalko daw nito ang pera. Another is we are checking if baka nasa listahan to (sa na-involved sa drugs,” saysay ni Carag.

Samtang laing pagpamusil ang nahitabo pasado alas 10 Byernes sa gabii sa Manora Apartment, Uldog road, sa Barangay Cansojong, Siyudad sa Talisay.

Ang biktima giila nga Jerusalem Berbo, alyas Jeber.

Nakaangkon kini og fatal nga mga igo sa lawas human siya gipusil sa wa ilhing mamumuno nga iyang gikalalis sa ilang giabangan nga apartment.

Si Jerusalem, 34, taga Barangay Lawaan 3 sa maong Syudad.

Matod ni Carag nga sa pakisusi, nagsugod og abang si Berbo uban ang usa ka babaye, niadtong Hulyo 1 ning tuiga pa lang.

Ang kapulisan sa Syudad sa Talisay nakadawat og tawag gikan sa tag-iya sa apartment human sa ilang pagdiskubre sa panghitabo.

Gisuwayan pa sa mga sakop sa Talisay Rescue Emergency Action Team (TREAT) sa pagtabang si Berbo, apan nakabsan sa kinabuhi.

Base sa kuha sa CCTV footage, adunay duha ka mga lalake nga wala pa mailhi ang nagsige og saka kanaog sa pikas nga apartment hangtud nga mao nalang nakita nga susama’g nagkalalis na sila ni Berbo.

Kalit nga nibunot sa iyang armas ang usa sa kalalis, dayon nipusil kang Berbo.

Ang kuyog sa biktima nga babaye gisuwayan sab og pusil, hinuon wa maigo.

Nisibat ang duha ka mga lalake sakay og motorsiklo samtang ang babaye nga kauban sa biktima dali usab nakasibat sa ilang giabangan nga apartment.

Si Carag nitug-an nga dunay nakabantay nga sukad nag-abang si Berbo, daghan nga tawo ang mosud ug gawas sa ilang lawak.

Pipila sa mga nasutang tigbisitahan sa biktima ang ilang nakita sa kapulisan nga naa sa drug watchlist.

Usa sa ilang gisubay karon nga motibo sa pagpatay kang Berbo may kalambigitan sa ginadili nga drugas.

Hinuon padayon pa ang kapulisan sa pagpalawom sa imbistigasyon kalabot sa duha ka pagpamusil.