CATARMAN, Northern Samar - Retirado nga sakop sa Philippine Army nga suspek sa robbery with rape nasikop sa kapulisan sa Northern Samar Police Provincial Office (NSPPO).

Ang suspek giilang mao si Dick Tan, 48, taga Barangay Cawayan ning lungsod.

Ang suspek nasikop sa hot pursuit operation sa kapulisan pinangulohan ni Police Lieutenant Colonel Christopher Luyun sa Provincial Intelligence Branch ug Police Captain Noel Unay sa Mondragon Police.

Si Tan nasikop sa Barangay Bugko, Mondragon, Northern Samar, alas 3 sa hapon, Huwebes, Oktubre 3, 2019.

Base sa report sa Police Regional Office (PRO) 8, positibo si Tan nga gitudlo sa usa sa mga biktima.

Nasayran nga pasado alas 2 sa hapon sa samang adlaw, siyam ka mga kawani sa ASA Philippines Foundation diha sud sa ilang opisina nga hinanok nakatulog. Upat ka mga tawo nga armado og pistola ug kutsilyo nga nagtaptap katunga sa ilang nawong kalit nga ningsud sa ilang opisina.

Gigapos sa mga suspek ang kamot sa mga biktima ug gibaatan ang baba gamit ang packaging tape. Duha sa mga suspek ninglugos sa duha sa mga babayeng biktima.

Gawas niini, nikuha kini sa salapi nga nikantidad og P118,785 ug 13 ka cellular phones nga nagkantidad og P102,890, laptop nga kantidad og P8,000, Seiko watch P9,000 ug Samsung tablet P7,000.