KANANGA, Leyte - Nasagmuyo ang bag-ong mayor ning lungsod, Matt Torres, nga usa lang ka barangay ang gideklarar nga drug-cleared.

Matod ni Torres nga sa iyang pag-asumir sa pwesto niadtong Hulyo 1, iyang nasayran nga sa 23 ka mga barangay sa lungsod, usa lang ang drug -cleared.

Sa interbyu sa Superbalita Cebu sa mayor, iyang gibutyag nga dunay dakong pundo ubos sa Peace and Order and Public Safety (POPS) Plan nga wala gigamit sa miaging administrasyon.

Dako og pagtuo si Torres nga mao kini ang dakong rason nga usa lang ka barangay ang nadeklara nga drug-cleared.

“Naa mi nadawat nga information nga kadto gani nga declaration is for compliance lang,” butyag ni Torres.

Hinuon giklaro sa mayor nga dunay gilatag nga plano ang miagi nga administrasyon, apan wa lang kini maimplementar.

“We had a new President nga seryuso pud sa iyang war against drugs. Wa kaayo gyod ma priority sa previous administration ang pagsumpo sa ilegal nga droga,” matod sa mayor.

Dugang ni Torres nga duna silay nakita nga usa ka socio cultural activity diin gikuha ang pundo sa peace and order.

“Dihay usa ka item sa peace and order for socio cultural. Ambot giunsa to og justify ato ngano naay socio cultural under sa peace and order plan,” dugang sa Mayor.

Gisaad ni Torres nga prayoridad niya karon nga mapun-an ang mga barangay nga drug-cleared.