GISUNOD sa Mactan Cebu International Airport Authority (MCIAA) ang guidelines ug protocol kalabot sa pag-atiman sa mga langyaw nga natanggong sa ilang pag-abot sa tugpahanan sa Sugbo.

Mao kini ang gipahibawo ni Mary Ann Dimabayo, pangulo sa Public Affairs Office sa MCIAA, pinaagi sa pagpadala og pamahayag sa media, human sa pipila ka taho nga nagsaway sa ilang pag-atiman sa mga langyaw.

Matod ni Dimabayo, ang pag-abot sa mga langyaw sa MCIAA nagpadayon apan kini nag-stop-over lang sa MCIAA alang sa ilang biyahe ngadto sa laing nasod gikan sa ilang dapit nga gigikanan.

Dason ni Dimabayo, ang ubang langyaw nga natanggong tungod sa guidelines nga gisunod sa MCIAA sama sa estriktong quarantine check ug ubang lagda sa tugpahanan aron malikayan ang pagkatap sa Covid-19.

Giklaro usab sa MCIAA nga dili usab nila responsibilidad ang pagpangita og hotel accommodation alang sa mga langyaw.

Dugang ni Dimabayo, igo ra sila mohatod niini sa mga hotel sanglit nagsunod lang sila sa mando sa nasudnong kagamhanan.

Apan, ang local government unit (LGUs) nga buot makig-alayon sa mga hotel dinhi sa Sugbo alang sa natanggong nga langyaw, dason ni Dimabayo, adto makig-alayon sa tukma nga ahensiya sama sa Department of Foreign Affairs (DFA) o Department of Tourism (DOT).

Nasayran sa Superbalita Cebu nga adunay mga langyaw gikan sa ubang dapit gawas sa Sugbo ang miabot dinhi ug giingong gipa-check-in una og mga hotel samtang naghuwat sa ilang flights pagawas sa nasod.

Gitataw sa MCIAA nga ang pagtugot sa pagpabiyahe sa natanggong nga mga langyawng pasahero sa Sugbo wala gahini sa MCIAA, diin misunod lang sa direktiba sa nasudnong kagamhanan pinaagi sa mandato sa Inter-Agency Task Force on Emerging Infectious Disease (IATF). (GCM)