Gitakda sa Metropolitan Cebu Water District (MCWD) karong buwana ang sunodsunod nga consultative meetings uban sa mga lokal nga opisyal, gikan sa mga mayor ngadto sa mga konsehal ug ngadto sa barangay level aron sila masayod ug makakuha usab og mga panahom ang water district sa ilang mga input sa gisugyot nga water tariff adjustment.

Mao kini ang gipahibawo sa MCWD sa ilang opisyal nga pamahayag sa Hulyo 16, 2022 human si Cebu City Mayor Michael Rama nisupak sa plano sa water district sa 60 porsyento nga umento sa bayranan sa tubig sa Hulyo 2023.

Ang water district niingon nga human sa ilang pagpakigtagbo sa lokal nga mga opisyal, ilang isunod ang mga public hearing,diin dapiton ang mga konsumidor kalabot sa samang hilisgutan.

Matod sa water firm nga ang mga konsultasyon maoy unang lakang nga girekisito sa Local Water Utilities Administration (LWUA) alang sa water utilities sa di pa sila moduso sa ilang aplikasyon.

“To date, MCWD already held consultative meetings with the barangay officials of Apas, Busay and Lahug, respectively. Last July 14, it presented its proposed water tariff adjustment to Cebu City Councilor Joel Garganera, Chairman of the Council Committee on Utilities,” matod sa ilang pamahayag.

Nipasabot sa sayo pa ang MCWD nga walo ka tuig nang wa sila mopahamtang og umento sa balayranan sa tubig matag cubic meter bisan kon ubos sa balaud, mahimo kini matag lima ka tuig.

Taliwa sa ilang mga kalisdanan nga gisagubang human sa bagyongg Odette niadtong Disyembre ug laing krisis sa nagpadayong gubat sa Ukraine, padayon silang nagpalambo sa ilang serbisyo.

“Just last year, it commissioned the Compostela Bulk Water Supply Project currently delivering 10,000 cubic meters per day to consumers in its northern service area. By September of this year, the P1.1-billion Lusaran Bulk Water Supply Project is scheduled to deliver additional volume of at least 15,000 cubic meters of water per day,” saad sa water district.

Si Rama, sa iyang bahin, niingon nga di siya gustong madugangan ang gipas-ang kalisod sa mga Sugboanon taliwa sa nagpadayong pandemic ug padayong pagsaka sa presyo sa lana ug mga palaliton. (gikan sa PR)