MOPALIT og 14 ka mga closed circuit television (CCTV) camera ang Talisay City government alang lang publiko nga merkado sa Tabunok.

Kini agig tubag sa reklamo nga nadawat ni Talisay City Mayor Gerald Anthony Gullas nga mga manindahay sa merkado gikawatan.

Sa nadawat nga taho sa mayor, duha ka mga tindera nga ang mga balde nga puno pa sa isda, wa na pasaylua, gilakip og gikawat.

Nipadayag og kaluoy ang mayor sa gagmay nga mga negusyanti o bisan na sa mga mamalitay, nga nabiktima sa mga kawatan.

Mao kini ang nag-aghat kaniya sa pagpalit na og 14 ka mga CCTV alang sa merkado. Iya kining gipadali.

Gipasabot sa mayor, nga ang una nga plano nga idungan ang pagpalit sa mga CCTV alang sa merkado ug sa second phase sa mga CCTV alang sudlunon nga mga karsada sa Siyudad nga sagad adunay problema sa trapiko.

Samtang, aron matutukan ang monitor sa CCTV sa merkado, diha ra pud kini ipahimutang sa buhatan sa market administrator.

Gipadangat na usab ni Gullas ngadto kang Police Major Orlando Carag Jr., hepe sa Talisay City Police Station, ang reklamo.

Ang kapulisan mopahugot sa ilang police visibility sa kamerkaduhan, dugang mga pag-roving, ug nga ilhon nila ang mga responsable sa kawat.

Lakip na ang giingong subli nga pagsiaw sa mga kawatan sa may Barangay San Isidro, Siyudad sa Talisay.