MOABOT sa 18,000 ka mga bata sa isla sa Olango dakbayan sa Lapu-Lapu ang nakapahimus sa tinuig nga “Kiddie Land” nga gimontar sa Isla sa miaging Sabado ug Dominggo.

Ang duha ka adlaw nga Kiddie Land sa isla gituyo aron paghatag og kahigayonan sa mga bata sa isla nga makasuway og sakaysakay sa mga rides ug uban pang mga makalingaw nga mga duwaanan nga sagad makit-an lang sa mga dagkong mall sa mainland.

Gimontar ang Kiddie Land sa sports complex sa Barangay Talima sa isla sa Olango.

Alas 9 sa buntag hangtod na sa alas 9 sa gabie sud sa duha ka adlaw nakapahimus ang mga bata sa isla sa Kiddie Land.

Ang maong kalingawan bukas usab sa tanang bata 5 -anyos pataas ug way gipili basta lumolupyo lang sa isla.

Gawas sa libreng duwa ug kalingawan, libre usab silang gipakaon sa City Government sud sa duha ka adlaw.

Gibutyag ni Lapu-Lapu City Mayor Paz Radaza nga mao na kini ang ika-limang tuig nga gibuhat nila ang pagbutang og Kiddie Land sa isla nga dili lang alang sa kabataan kundi alang usab sa mga ginikanan. (GCM)