MAS maayong mosayo ka og biya sa balay kon ang imong flight sayo sa kaadlawon o buntag.

Sirad-an karong sayo sa kaadlawon, Agusto 11, ang dagkong mga karsada gikan sa Dakbayan sa Talisay ngadto na sa Dakbayan sa Lapu-Lapu.

Kini alang sa tinuig nga Ironman 70.3 Philippines.

Kadaghanan sa mga karsada buksan pagbalik mga alas 12 sa udto ngadto na sa alas 3 sa hapon.

Sa Dakbayan sa Talisay, di na paagian ang South Coastal Road samtang nagpatuman usab sila og truck ban.

Ang Cebu City Transportation Office (CCTO) mosirado sa tibuok Serging Osmeña boulevard sa North Reclamation Area (NRA) paingon sa Cebu South Coastal Road sugod alas 5 karong buntag hangtod alas 12 sa udto para paghatag og agianan sa bike event sa Ironman 70.3 Philippines.

Si Ricardo Barandog Jr., executive director sa CCTO, nagkanayon nga adunay 185 ka mga traffic enforcers ipakatap sa City Government para maoy motabang sa pagpahapsay sa trapiko ug maoy mogiya sa mga sakyanan.

Ang pangulo sa CCTO niingon nga kaganinang alas 3 sa kadlawon, nagsugod na og pamutang og signage ang mga traffic personnel para maoy sundan sa mga driver gumikan sa rerouting nga ilang gipatuman.

Si Barandog nagkanayon nga ang tanang sakyanan gikan sa Talisay, Minglanilla, Naga nga adto mag-agian sa Cebu South Coastal Road adto na moagi sa N. Bacalso avenue lahos sa dalan Imus ug paingon sa NRA subay sa dalan A. Soriano o lahos sa barangay Mabolo. (PAC)