GIHULAGWAY ni Lapu-Lapu City Mayor Junard “Ahong” Chan nga gigamit ug gipugos ang mga kapitan sa dakbayan sa pag file ug kaso batok kaniya kalabot sa pagpapahawa ni Kongresista Paz Radaza sa buhatan nga nahimutang sa Lapu-Lapu City Hall.

Matod niya adunay mga kapitan nga miadto sa iyang buhatan niadtong Miyerkules aron mopahibawo kaniya nga napugos ra sila pagpirma sa complaint batok kaniya.

Usa usab kini ka pamaagi, sumala pa niya, nga mapaubos sa loyalty check ang mga kapitan kon na pa gihapon ni Radaza.

Giangkon sa mayor nasagmuyo siya sa gibuhat sa mga kapitan ngadto kaniya, apan katungod usab nila ang ilang nakab-ot nga lakang batok kaniya.

Nasayran nga 28 ka mga kapitan sa dakbayan nailang kaalyado sa kampo sa mga Radaza samtang 2 lang ang nailang kaalyado niya sa pagkakaron.

“This is one way of checking if the barangay captain is still there so naa may lima nga wala mopirma unsa may pasabot niana naay nipirma apan nipadayag nga napugos ra sila,” matod ni Chan.

Subling gihimug-atan sa mayor nga ihiklin na lang unta nila ang politika sanglit humana man ang piniliay ug magtambabayong na lang sa pag serbisyo sa katawhan.

Alang kaniya gamay ra kaayo ang isyu kalabot sa opisina ni Radaza para pasakaan og kaso sa mga kapitan.

Ang legal opinion sa Department of Interior and Local Government (DILG) mao ra gayud ang iyang gibasehan sa pagpapahawa ni Radaza sa iyang kanhi buhatan.

Mipasalig hinuon si Chan nga bisan pa man sa kasong gisang-at batok kaniya sa mga kapitan dili gihapon maapektohan ang iyang relasyon unya ngadto kanila hilabi na sa pagpadangat sa serbisyo sa kabarangayan.

Giatiman na usab sa city legal office ang pagtubag sa kaso batok kaniya sanglit dili niya priority ang pag-atiman niini sa pagkakaron sa kadaghang suliran sa dakbayan nga iyang gitutokan sama sa hospital, baha, traffic ug uban pa.

“Well kung malipay sila nga ang mayor sa Lapu-Lapu nga nagtrabaho masuspenso dawaton lang pud na sa mayor anyway ang katawhan ang mga Oponganon nasayod unsa akong gibuhat gitrabaho dinhi sa akong katungdanan isip amahan sa syudad” matod ni Chan.

Si Association of Barangay Council ABC president Eduardo Cuizon mipakagamay ra hinuon sa pasangil ni Chan ug miklaro nga dili ra usab ang pagpasaka ug kaso ang ilang giatiman sanglit sayod ang ilang mga konstituwenti nga nagtinarong usab sila sa ilang pag serbisyo.

“Dili na tinuod sir, amoa ra gyud to pwedi niya pangutan-on tagsa-tagsa when in fact pag-ingon namo ni madame (Radaza) sa amo plano igo ra gyud siya niana kamo inyo nang desisyon” matod ni Cuizon. (GCM)