Doble ang pagmaya sa mga kawani sa Lapu-Lapu City Hall nga nisaulog sa ika-60 nga Charter Day dakbayan kagahapon, Hunyo 17, tungod sa pagpahibalo ni Mayor Junard Chan sa paghatag kanila og Charter Day bonus.

Sumala sa mayor, tan-awon pa sa kagamhanan kung pila ang ilang ihatag nga bonus sanglit agdon ang pundo sa kagamhanan kalabot niini.

Ang kagamhanan sa Lapu-Lapu una nang nigahin og pundo alang sa quincentennial bonus o ika-500 nga anibersaryo sa Kadaugan sa Mactan alang sa mga kawani sa dakbayan.

Ang konseho sa dakbayan mipasar na og resolusyon nga maghatag og Charter bonus sa tanang kawani sa dakbayan sa kantidad nga P3,000.

Alang kang Chan, iya pa usab kini tan-awon kung moabot sa iyang buhatan alang sa pirma sa resolusyon tungod sa pagsusi bahin sa pundo sa kagamhanan.

Gipasabot ni Chan nga dili diha dayon madawat sa mga empleyado ang ilang bonus apan mipasalig siya nga dili kini moabot pa og sunod tuig.

“Ato lang usahon ang Charter Day bonus ug Quincentennial bonus para maka-save kay sayod man ta nga ang atong siyudad karon are facing this pandemic. We are hardly hit with this pandemic gamay ra gyud ta kaayo og collection,” matod ni Chan sa Superbalita Cebu. / GCM