GIAWHAG sa Department of Environment and Natural Resources (DENR) 7 ang tanang local government units nga aduna’y coastal areas nga mosalmot sa International Coastal Clean Up karong Septiyembre 21, Sabado.

Sa labing uwahing update sa DENR 7, mosalmot sa kalihukan ang Lapu-Lapu City, Cordova, Talisay City, ug Minglanilla sa Cebu; Poblacion sa Siquijor; ug ang mga coastal municipalities sa Bohol ug Negros Oriental.

Matod ni Queen Aloyan, International Coastal Clean Up Focal Person sa DENR 7, nga mao kini ang ilang mga partner LGUs nga aduna’y ceremony nga pagahimuon isip timaan sa tinuig nga kalihokan.

Base sa Presidential Proclamation 470 niadtong 2003, gideklarar sa kaniadtong Presidente Gloria Arroyo nga International Coastal Clean Up Day ang matag ikatulo nga Sabado sa Septiyembre.

Base sa datus sa DENR, nasayran nga sa Pilipinas, nag-unang hinungdan sa nagkadaghang basura sa nasod kining mga plastic wrapper o candy wrappers o mga sachet sa shampoo/conditioners.

Sa Central Visayas lang, moabot sa 2.8 milyones nga kilos sa basura ang makolekta matag adlaw. (HBL)