Inanay nang nangandam ang mga lokal nga kagamhanan sa probinsya sa Sugbo alang sa pasundayag sa mga presentasyon sa umaabot nga Pasigarbo sa Sugbo sa Agusto.

Nalakip na sa mga unang giandam sa mga lokal nga kagamhanan ang pagpa audition sa mga mahimo unyang dancers nga mo representar sa ilang lokalidad.

Pipila sa mga lungsod sama sa Argao, Badian, Bantayan, Barili, Consolacion, Compostela, Malabuyoc ug dakbayan sa Bogo nagsugod na sa pagsusi alang sa mga mananayaw ug ingon man sa ilang festival queen.

Gibutyag ni Provincial Tourism Office Marti Ybañez nga sagad sab sa ubang mga LGU nakasugod na sa pagbansay niadto pang Pebrero.

Sa kasamtangan gihan-ay pa sa Cebu Provincial Tourism Office ang mga guideline nga mahimong sundon sa mga contingent alang sa Pasigarbo sa Sugbo 2023.

Una nang gihagit ni Cebu Governor Gwendolyn Garcia ang mga mayor sa pag “level-up” sa ilang mga presentasyon karong tuiga.

Ang Festivals of festivals o mas naila nga Pasigarbo sa Sugbo gikatakdang ipahigayon sa Agusto atol usab sa founding anniversary sa Probinsya sa Sugbo. / ANV