Kanhi barangay kapitan nasikop uban sa 19 niya ka mga silingang mananagat nga taga Boljoon kay namasol sa alas 9:15 sa gabii sa Martes, Hunyo 29, 2021 sa kadagatan sa Brgy. Poblacion, lungsod sa Oslob, habagatang Sugbo.

Ang ilang gibuhat kalapasan sa municipal ordinance nga nagdili sa mga taga laing lungsod sa pagpanagat sa Oslob nga way permit.

Usa usab kini ka kalapasan sa Republic Act 8550 kun Philippine Fisheries Code of 1998.

Napusasan si Dioscoro Romeo Awi, 59, minyo, kanhi barangay kapitan sa Arbor, Boljoon uban kanila ni Avito Gonza, 37; Medardo Gonza, 42; Elmer Romeo, 30; Emelio Mier, 51; Felipe Felices, 74; Egmedio Gonza, 73; Godofredo Mier, 43; Richard Dela Cerna, 32; Marcelo Tural, 54; Emmanuel Castillo, 44; Alex Medrano, 44; John Eric Alboro, 29; Dino Jay Niere, 20; Roger Caitor, 43; Jill Belleta, 27; Ramgie Latrez, 28; Diosdado Tanilon; 42, ug Generoso Mier, 46.

Si Police Staff Sergeant Danta Nuñega sa Oslob Police Station nga nahinabi sa Superbalita Cebu nagkanayon nga nanagat ang sila si Awi bisan kon ubos na sa jurisdiction sa lungsod sa Oslob.

Dunay naka-report kanila nga dunay daghang nanagat sa dapit busa nilusad sila og seaborne patrol.

Sa ilang pagsusi ni Police Staff Sergeant Chito Ondac ug Bimboo Villamor Gilles, fish warde, nasuta nga way permit nga managat sila si Awi sa maong dapit.

Ang mga mananagat nagsakay sa 10 ka pump boat sa ilang pagpamasol.

Apan gibuhian sila sa Miyerkules sa buntag human sa upat ka oras nga community service.

Nanglimpyo ang maong mga mananagat sa kadalanan sa Oslob.

NAG-CHAT