GISUPORTAHAN sa mga mayor sa 44 ka mga lungsod ug tulo ka mga dakbayan sa lalawigan sa Sugbo ang baruganan sa kagamhanan sa probinsya sa pagbaligya o ba kaha ang pag-transport og dolomite gikan sa Lungsod sa Alcoy aron pagpanindot sa Manila Bay.

Milagda sa usa ka hiniusang resolusyon ang mga mayor nga mao ang Resolution no. 70 niadtong Septiyembre 10, 2020 isip pagsuporta sa lakang sa Kapitolyo labot sa pagproteher sa kinaiyahan sa naasoyng lungsod.

Gipadayag sa maong resolusyon nga kon mopadayon ang pagkubkob sa bukid sa lungsod, dako kini og kadaot sa kalikupan og giingong usa ka dakong kalapasan sa katungod sa matag sugboanon sa usa ka balanse nga palibot.

Septiyembre 3, nasayran nga gikan sa Alcoy ang giabuno nga “white sand” alang sa rehabilitasyon sa Manila bay.

Nasuta sa Kapitolyo nga wala mopahigayon og konsultasyon ang mga nagduma sa Dolomite Mining Corp. (DMC) ug Philippine Mining Services Corp. (PMSC) sa pagbaligya og dolomite sa lokal nga merkado.

Sukwahi kini sa Mineral Production Sharing Agreement (MPSA).

Tungod niini, mi syu og cease and desist order (CDO) si Gobernador Gwendolyn Garcia aron mahunong ang pagbaligya og pag-transport og dolomite ug ubang minerales sa lungsod.

Paagi usab kini nga mapugngan ang pag issue og Ore Transport Permit (OTP) nga nag ung-ong sa opisina sa Mines and Geosciences Bureau (MGB-7).

Subay sa resolusyon buot sa mga kadagkoan nga susihon ang dokumento sa duha ka naasoyng kompaniya kon naka-comply kini sa rekisitos sa probinsya og nakabayad sa obligasyon niini. (ANV)