Gipahibawo ni Lapu-Lapu City Mayor Junard Chan nga limitado ang gitugotang linawas nga makasaksi sa ika-500 ka tuig nga Kadaugan sa Mactan sa Abril 27, 2021.

Kini nunot sa pandemya sa coronavirus nga padayon nga nasinati bisan kon nagkagamay ang mga kaso.

Giawhag ni Chan ang mga Oponganon ug uban pang mga Sugboanon sa pagsaksi na lang unya sa mga kalihukan pinaagi sa online gumikan kay limitado ug imbitado lang ang mahimong makasaksi sa mga kalihukan sa Liberty Shrine sa Brgy. Mactan.

Gani, gibutyag sa mayor nga gumikan kay anaa si Presidente Rodrigo Duterte sa Abril 27, ang tanang mosaksi o imbitado sa kalihukan kinahanglan mopaubos sa anti-gen test alang sa coronavirus disease 2019 (Covid-19).

Kadtong magnegatibo mao ray tugotang makasulod sa Shrine. Lakip sa mopaubos niini mao ang mga sakop sa media nga mo-cover sa kalihukan.

Gani, ang entourage sa Presidente kinahanglan makapakita usab og negatibong resulta sa reverse transcription-polymerase chain reaction (RT-PCR) test 48 ka oras sa dili pa ang kalihukan.

Ang mga performer usab lakip sa mosunod sa maong mga protocol, apan gibutyag sa mayor, karon pa lang ka sayo, gilahi na sila daan og pinuy-anan aron dili na ma-expose pa og laing tawo.

Sa ingon layo ang kahigayunan nga sila matakdan sa Sars-CoV-2, nagdala sa Covid-19.

“Probably the number of persons nga naa sa maong celebration very few because of the President and I’m sure the protocol is, before you will enter the Shrine, is you will have anti-gen test so once positive ka sa IGG, meaning nakaagi na ka og Covid, mo-undergo nasad ka og anti-gen test,” matod ni Chan.

Gipadayag sa mayor nga alang sa mga turista hilabi na sa mga gikan sa kaulohan, wala ray kausaban sa mga rekisitos sa pagbisita sa dakbayan niining nagsingabot ang kasaulogan.

Ang importante makapakita lang sila og booking sa mga resort diin sila mag-estar.

MGA KALIHUKAN