KAMPO sa mga rebeldeng New People’s Army nga himoanan sa improvise explosive device (IED) natultolan ug gisulong sa kapulisan sa Central Visayas ug kasundalohan.

Mga armas ug gamit sa paghimog bomba nasakmit.

Duha usab ka gidudahang mga rebelde nadakpan ug laing duha gipaubos sa imbestigasyon.

Alas 6:30 Dominggo sa buntag, Agusto 18, ang mga sundawo ug Regional Mobile Force Battalion 7 milusad sa laing hugna sa combat operation sa sitio Kabilukan, Barangay Bactulon, Dakbayan sa Sipalay, Negros Oriental.

Ang ilang rumbo ang kampo sa NPA nga maoy himoanan sa ilang mga IED.

apan sa pag-abot sa mga sundaWo ug kapulisan, nahitabo dayon ang pinusilay sa duha ka mga habig nga milanat og 5 ngadto sa 10 minutos.

Ang mga armadong NPA ning-atras agi sa luyo sa ilang kampo nga dunay mga limestone formation ug wa na maabti pa.

Atol sa clearing operation, ilang nakaplagan ang nagkadaiyang mga IED ug mga gamit sa pag himo niini.

Ila usab nga nasikop ang duha nga gituohang mga NPA nga silang Roberto Tingson, 34; ug Jory Mate, alyas Vic-vic, 38, taga Barangay Camindangan, bukirang dapit sa siyudad sa Sipalay.

Aduna pay laing residente sa dapit ang gipatawag ug gipaubos sa imbestigasyon kon nalakip ba sila sa mga kalihukan sa komunistang grupo sa Negros Oriental.

Nagkadaiyang mga armas, bala, bomba ug subersibong dokumento nakuha sa kapulisan.

Gihulagway pa hinuon ni Police Regional Office Director Police Brig. General Derbold Sinas ang kinatibok-an sa Negros Oriental nga malinawon pa ug way angayan nga kabalak-an sa kahusay ug kalinaw tungod sa daghang presensya sa mga pulis ug sundawo.