“WA GYUD DAMHA.”

Mao kini bugtong malitok sa Team Deretso sa mga Radaza sa dakbayan sa Lapu-Lapu kalabot sa kapildihan sa ilang standard bearer nga si kanhi Kongresista ug Mayor Arturo “Boy” Radaza ug runningmate niini nga si Konsehal Harry Don Radaza ngadto ni Pajo Brgy. Captain Junard “Ahong” Chan ug sa runningmate niini nga si Celsi Sitoy sa Team Libre.

Kini human nga si Chan, atol sa piniliay niadtong Lunes, Mayo 13, mihagdaw og 85,976 ka mga botos batok sa 66,108 nga nakuha ni Boy Radaza sa pagkamayor sa dakbayan. Samtang sa panagtigi sa vice-mayorship, si Sitoy mitali og 70,533 ka mga botos batok sa kang Harry Radaza nga igo lang nakakolekta og 64,941 botos.

Hinuon, ang ilang kandidato sa pagka kongresista sa lone district sa maong siyudad nga si incumbent Mayor Paz Radaza midaog batok kang Eugene Espidido. Si Mayor Paz, sa kinatibuk-an, nakumkom og 76,645 ka mga botos batok sa 62,784 botos ni Espidido.

Sa mga konsehal, napulo ka mga sakop sa Team Deretso ang nakakuha og puwesto sa dose ka lingkuranan samtang duha lang ang mga sakop ni Chan.

Kini mao sila si Marcial Ycong, Ricardo Amores, Efren Herrera, Queenie Malingin, Junrey Gestopa, Babon Potot, Rex Mangubat, Epoy Paquibot, Bobit Hiyas, ug Joe Dungog nga pulos kaalyado sa mga Radaza.

Samtang ang duha nga kagrupo ni Chan mao sila si Janvi dela Cerna ug Nelson Yap.

Si Radaza, human sa piniliay, nagkanayon nga wala na silay mahimo kun ugaling mao gayud kini resulta piniliay, apan dili gyud mawala sa ilang kampo ang katingala sa resulta.

Hinuon wa siya mobutyag kon mopasaka ba sila og protesta, apan hayan ila pa kining sabutan sa grupo kon unsay sunod nilang lakang nga buhaton.

Si Chan sa iyang bahin mibutyag nga ang iyang kadaugan nagpakita lang nga mas gipaboran sa mga Oponganon ang kabag-ohan sa dakbayan.

Mapasalamaton nga mituo ang katawhan sa iyang plataporma sa tiunayng pagpanerbisyo.

Prayoridad niya matod pa ang pagpanindot sa District Hospital ug Merkado Publiko sa dakbayan ingon man ang pagpalambo sa kinabuhi sa matag Oponganon.

Andam usab siya nga makig-uli sa maayong kabubut-on sa kampo sa mga Radaza sanglit natapos naman ang piniliay.

Masaligon usab siya nga dili mamolitika ug magkahiusa ra ang konseho sa dakbayan bisan mayorya sa nakalingkod niini mga ka partido sa mga Radaza.

“Well, ang atoang style of leadership transparent ta. Atoang mga kaubanan nga napili sa katawhan ako nagtuo nga moserbisyo sila sa tinarong ug tinud-anay. So kung dili sila mosuporta adto ta mosumbong sa atong katawhan Oponganon,” matod ni Chan. (GCM)