Di momenos 12 ngadto sa 15 ka mga pamilya sa Barangay Maigang, lungsod sa Barili gipabakwit gumikan sa anam-anam nga pag-irog sa yuta sa dapit.

Kini maoy gikompirmar ni Neil Sanchez, pangu sa Provincial Disaster Risk Reduction and Management Office (PDRRMO) sa Enero 31, 2023.

Subay sa uwahing pakisusi sa buhatan, moabot sa 30 ngadto sa 40 ka mga balay ang apektado sa hitabo.

Ang nakitang pagpangliki sa yuta sa dapit unang nabantayan sa Enero 12, 2023.

Sa pagsusi sa mga awtoridad, usa sa mga hinungdan niini mao ang paghumok sa yuta gumikan sa sagunson nga pag-uwan.

“It has been observed in this area that the water runoff coming from higher ground will go directly to the concrete road (without drainage) and does not allow the water to soak to the ground which may cause many cumulative impacts to human and the environment including flooding, damage to public and private property, eroded stream banks,” saysay sa PDRRMO.

Subay niini, girekomendar sa local MDRRMO nga padayong susihon ang lugar ug ang mga nagpalibot sa dapit.

Sa listahan sa PDRRMO, duol sa dapit ang Maigang barangay hall, barangay health station ug San Juaquin Chapel.