HUMAN sa clearing operation daplin sa dalan sa Tabunok market, isunod sa pagpalimpyo ang mga sidewalk sa national highway nga nakapalibot sa Barangay Tabunok.

Kini aron mao na say isunod nga ideklarar nga discipline zone nga barangay sa Siyudad sa Talisay.

Karong buntag, Agusto 17, ipatuman ang clearing operation sa sidewalk nga nakapalibot sa Tabunok flyover.

Gitug-an ni Jonathan Tumulak, pangulo sa City of Talisay Traffice Operations Development Authority (CT-TODA), nga namintinar na ang maayo nga dagan sa trapiko sa Tabunok.

Ang mga barangay opisyal nipahibawo niadtong Huwebes ug Byernes, Agusto 15 ug 16, pinaagi sa pagbisita sa tanan nga mga establisemento, kansang mga estraktura nakaali sa sidewalk.

Giawhag sila sa paghinlo ug pagboluntaryo sa pagguba aron di maapektuhan sa clearing operation sa pag-demolish o pagsakmit sa bisan unsa nga nakaali sa sidewalk.

Mangulo ang clearing team sa Talisay City hall.

Ang CT-TODA molimpyo sa sidewalk pinaagi sa pagbadlong sa mga nagataka og park nga mga motorsiklo ug trisikad sa kilid sa dan nga mao untay agian sa katawhan.

Sitahon nila ang mga nag-illegal parking, apan kon way tag-iya, ilang kompiskahon ang mga motorsiklo ug trisikad.

Ang target sa clearing operation gikan sa St. Joseph nga simbahan, padung sa Tabunok flyover.

Laing dapit naglakip sa temporary nga terminal sa mga PUJ, ug mga tricycle nga gipanag-iya sa Alturas padung usab sa fly-over ug dalan gikan sa Barangay Lagtang, padung sa Tabunok. Gihimo kini aron mahingpit ang tinguha nga human sa Barangay Poblacion, masunod ang Tabunok sa ideklarar nga discipline zone.

Ang discipline zone proyekto sa Talisay City Police Station nga gisuportaran sa lokal nga kagamhanan.

Matod ni Tumulak, nga sukad nahan-ay ang Tabunok market, wa silay nadawat nga problema kalabot sa paghuot sa trapiko sa maong lugar ug sa mga namaligya sa sidewalk.