GIAPROBAHAN na sa unang pagbasa ang ordinansahon nga maghimo og terminal ug stops sa public utility jeepney ug bus-jeep (beep) sa dakbayan sa Sugbo.

Ang proposed ordinance ni Konsehal Raul Alcoseba ug Eugenio Gabuya Jr., gipaluyohan sa Land Transportation Office (LTO) 7 ug Land Transportation Franchising and Regulatory Board (LTFRB) 7 atol sa gipahigayon nga public hearing kagahapon, Pebrero 18.

Si Joel Maloloy-on, pangulo sa Cebu City district office sa LTO nagkanayon nga way pagsupak ang ilang buhatan sanglit sila nagtuo nga kini maoy usa sa mga paagi aron mamnisan kon dili man masulbad ang kahuot sa trapiko sa siyudad.

Mao sab ang baruganan sa LTFRB ubos sa representasyon Legal Officer Edwin Antipuesto kinsa nihulagway nga tukma sa panahon ang maong ordinansahon ug mahinungdanon ang pag-update sa mga stops sa mga PUJ ug Beep gumikan sa nag-anam kadaghan ang sakyanan sa karsada.

Ang LTO maoy gisangonan sa registration sa mga sakyanan lakip ang driver’s license samtang ang LTFRB mao ang adunay hurisdiksyon sa pag-isyu, paguspenso o pagkansela sa mga prangkisa sa Public Utility Vehicle (PUVs).

Si Alcoseba kinsa maoy main-author sa maong ordinansahon niingon nga problema sa karsada ang mga PUJ ug BEEP nga iyang gitawag og “king of the road” sanglit bisan asa lang mohunong para mopasakay ug mopakanaog og pasahero.

Ang maong ordinansa maoy mahimong basehan sa pagtukod og terminal sa PUJ ug BEED diin usa sa north ug usa sa south nga mahimo silang makahuwat og mga pasahero.

Base sa proposed ordinance, ang mga drivers nga makalapas ug masiyohan og citation ticket sa mga enforcer makamulta og P500 sa first offense, P1,500 sa second offense ug P3,000 sa third offense uban sa pagpa-ilawomn og seminar labot sa traffic rules ug regulations.

Ang drivers nga kanunay na nga molapas sa maong ordinansa pamultahon og P5,000 uban sa rekomendasyon sa pagkansela sa ilang driver’s license ug prangkisa.

Ang mga pasahero apil sab nga silotan og pamultahon og P2,000 kon masakpan silang mosakay o manaog sa mga lugar nga wala gitugot sa proposed ordinance.

Sa matigom nga penalty, adunay 25 porsiyento nga bahin ang barangay diin nadakpan ang mga PUV samtang 75 porsyento ang maadto sa panudlanan sa dakbayan. (PAC)