NASIKOP sa kapulisan ang driver sa puti nga pickup truck nga naka hit-and-run sa usa ka biker niadtong Dominggo sa kaadlawon, Enero 24, 2021, sa national highway sa Barangay Cogon, Dakbayan sa Naga.

Si Joseph Elgie Gentapa, 24, ulitawo, nagpuyo sa usa ka subdivision sa Barangay San Isidro, Dakbayan sa Talisay City.

Si Gentapa nasikop sa follow up operation sa kapulisan sa mga Dakbayan sa Naga ug Talisay alas 2:10 sa hapon, Lunes, Enero 25, sa ilang balay.

Iyang na hit-and-run ang biker nga si Jose Romelo C. Blanco, taga Brgy. South Poblacion, Dakbayan sa Naga, nga niresulta sa kamatayon.

Si Police Lt. Colonel Florendo Fajardo, hepe sa Naga Police Station nga nahinabi sa Superbalita Cebu, nagkanayon nga nakig-alayon sila sa kapulisan sa Dakbayan sa Talisay ug taga Traffic Operations sa Talisay.

Nasubay niila pinaagi sa CCTV camera nga ang puti nga sakyanan niagi sa San Isidro, Talisay City.

Nakig-alayon sab sila opisyal sa Brgy. San Isidro ug nakakuha sab sila og footage sa CCTV camera.

Si Fajardo niingon nga ang ilang mga sakop uban sa kapulisan sa Talisay misuhid sa subdivision sa dapit.

Ilang nakit-an ang puti nga Nissan Calibre nga guba kaayo ang atubangan.

Si Gentapa dihang ilang gisikop igo lang nga nibutyag nga gikan siya nisuroy sa lungsod sa San Fernando.

Giandam na sa kapulisan ang tukmang kaso batok kang Gentapa.

Si Blanco nga nagsakay sa iyang mountain bike niadtong Dominggo naigo sa usa ka puti nga pickup truck.

Ang hitabo nakuhaan og CCTV footage nga gipang post sa social media aron sa pag-ila sa drayber.