WALA mabalaka si Bise Mayor Michael Rama sa himuong pakisusi may labot sa iyang giluwatan nga executive order nga nagpatuman sa “no vaccination, no dine-in policy” sa dakbayan sa Sugbo.

Kini human nipadayag ang ulohang buhatan sa Department of the Interior and Local Government (DILG) sa pagsusi sa maong EO sanglit gibutyag ni Secretary Eduardo Año nga wala kiniy pagtugot sa Inter Agency Task Force (IATF).

Si Rama kinsa maoy acting mayor niadtong higayona niingon nga iyang gihangop ang paglusad sa inquiry sa DILG-7, aron nga madungog usab ang habig sa business sector nga maoy nagsugyot sa maong pamaagi aron sila makabalik sa ilang negosyo ug makontrolar ang pagkatap sa Covid-19.

Giklaro ni Rama nga wala gibawal ang mga tawo nga mosulod sa mall, simbahan ug sa ubang establisemento gawas niadtong lugar nga posibleng taas ang posibilidad sa pagtinakdanay sa virus maoy ilang gi-istrikto ug ang gitugotan mao lang kadtong bakunado.

“Wala man giingon nga dili pwede mosulod sa malls. Ari ra man sa area where we are a little bit concerned. Kon ato ni silang pangablihan lang nga walay restrictions, di way nada ang atong efforts. Now we will be able to manage our Covid situation,” matod ni Rama. (PAC)