Nikunhod og 20 porsyento ang mga nakalapas sa balaud sa trapiko nga nadakpan sa operasyon sa Cebu City Transportation Office (CCTO) sa Nobiyembre kon utandi sa 2020.

Base sa record sa record section sa CCTO, ang ilang buhatan nakadakop og 11,661 ka mga sakyanan, apil na ang mga motorsiklo.

Mas ubos kini itandi sa 14,544 nga nasikop sa Oktubre 2020.

Sa mga nadakpan, 710 ka sakyanan na-impound, labing daghan niini mga motorsiklo (655), four-wheeled vehicle (37), truck (14), trailer (8), taxi (3), trisikad (2) ug bus (1).

Si Alma Casimero, pangulo sa CCTO, nagkanayon nga niubos na ang gidaghanon sa mga nadakpan gumikan kay ilang nakita nga nituhop na sa tagsa-tagsa ka huna-huna sa mga drayber ang pagbaton og disiplina ug pag-obserbar sa mga lagda sa trapiko.

Matod ni Casimero nga way hunong ug way kausaban ang ilang pagpahigayon og mga operasyon batok sa mga malapason sa lagda sa trapiko.

Dungan usab niini, nius-os ang mga malapason nga naisyohan og citation tickets.

Gihingusgan usab sa CTO ang pagpanakop sa mga jaywalker sa mga karsada sa dakbayan sa Sugbo bisan panahon sa pandemic. / PAC