ORMOC City, Leyte -- Miubos ang mga kaso sa mga teenager nga nangmabdos sa Dakbayan sa Ormoc.

Kini ang gibutyag sa Integrated Population Gender and Development Office (IPGDO) sa usa ka seminar sa Liga ng mga Barangay.

Sa 2017, nakatala ang Dakbayan og 741 ka mga teenager nga nangmabdos, apan niubos kini sa 658 sa 2018.

Ang mga teenager nga nimabdos nag edad og 15 ngadto sa 19 anyos.

Gawas niini, sa miaging tuig dunay, top 6 ka barangays sa dakbayan ang dunay sagad kaso sa mga teenager nga nimabdos.

Apan karong tuiga, sa unom nga natala, duha nalang ang nahabilin.

Matod ni Jhay Gaspar sa City Youth and Development Office (CYDO), ilang gipatawag ang Sangguniang Kabataan officials aron hisgutan ang mga programa pagpakgang sa teenage pregnancy.

Nagmalampuson ang mga programa nga giimplementar hinungdan nga niubos ang ihap sa mga batan-ong nga nimabdos.

Gisugilon sa IPGDO nga ang kasamtangan nga lifestyle sa mga bata-on ang usa sa mga rason nga daghan ang nimabdos nga bata pa.

Sa 2010, ang Eastern Visayas dunay 780,378 ka mga bata.

Gipakita sa taga IPGDO nga base sa 2010 survey, 66 porsyento sa mga bata sa Eastern Visayas duna nay cellphone.

Samtang 42.7 porsyento ang moinom na og ilimnon nga makahubog ug 46.6 porsyento ang mo tan-aw na og X-rated movie. (JKDP)