Hamtong nga lalake nga nangumpra og kaka gipusil patay sa tulo ka mga lalake nga nagsakay sa motorsiklo alas 12:30 sa kaadlawon sa Sabado, Nobiyembre 20, sa Purok Toong, Brgy. Dunggoan, dakbayan sa Danao.

Ang biktima giilang si Eleuterio Toriffel, 43, minyo, taga Brgy. Casili, lungsod sa Consolacion.

Si Police Master Sgt. Jose Michael Alegado sa Danao Police Station nga nahinabi sa Superbalita Cebu nagkanayon nga si Toriffel nangumpra og “kaka” sa iyang higala dihang kalit nga mi-abot ang duha ka mga gunman, gipusil siya sa nagkadaiyang parte sa kalawasan hinungdan sa iyang pagkamatay diha-diha.

Ang duha ka mga gunman nagdalig biya sakay sa usa ka motorsiklo nga nagpaabot duol sa crime scene.

Ang mga nakasaksi mibutyag nga ang mga killer pulos nagsul-ob sa kolor itom nga jacket, naka-hood, medium ang panglawas, 5’4 ang gitas-on.

Matod pa ni Alegado nga gisubay pa nila kon unsay motibo sa kremin.

Wala sab nila isalikway ang posibilidad nga nalambigit sa illegal si Toriffel.