Tungod kay nakalimot sa pag-lock sa pultahan sa ilang giabangang kwarto sa usa ka pension house, asawa nasakpan sa akto sa bana nga gipatungan sa giingong kabit nga usa ka retired fireman samtang “naghilawas” sa alas 10:30 sa gabii sa Sabado, Disyembre 3, 2022 sa Barangay Tapon, lungsod sa Dalaguete.

Una niini, si Eric (dili tinuod nga ngan), 43, minyo, seaman, taga Barangay Pugalo, lungsod sa Alcoy, nangayo og pakitabang sa kapulisan sa Dalaguete.

Si Major Gilfred Baroman, hepe sa Dalaguete Police Station nga nahinabi sa Superbalita Cebu kagahapon, Disyembre 7, 2022, nagkanayon nga ang bana niabot sa ilang buhatan ug nangayo og abag human nakit-an niya ang iyang asawa nga dunay kuyog nga lalaki nga nisulod sa usa ka pension house.

Matud ni Baroman, ilang giubanan ang bana sa pagsusi sa pension house.

“Wala nila ma-lock ang pultahan sa kahinam na siguro to. Nagpatong gyud ang retired fireman, hubo sila,” asoy ni Baroman.

Sa pagsulod na sa mga pulis, daling nakasul-ob ang lalaki sa iyang underwear samtang ang babaye nibukot sa habol, dugang niya.

Sila si Angela (di tinuod nga ngan), taga Brgy. Pugalo, Alcoy ug Mario (di tinuod nga ngan), taga Barangay Balisong, Argao napusasan human sila nakasul-ob sa ilang sinina.

Sumala ni Baroman, si Eric nibutyag nga nakadawat siya og impormasyon kalabot sa gibuhat sa iyang asawa samtang didto siya sa gawas sa nasod sakay sa usa ka barko.

Ang iyang mga higala ug kabanay pulos ningtaho nga ang iyang asawa nagbisyo, dunay gikarelasyong lalaki.

Sa pag-uli niya sa Pilipinas, samtang diha sa ilang balay, nagpakaaron-ingnon lang siya nga wala masayod sa binuhatan sa iyang asawa aron sa pagpanalipod sa ilang duha ka mga anak nga pulos lalaki, 9 ug 8 anyos.

Sa naasoy nga gabii, nakabantay siya nga ang iyang asawa nilakaw ug dihang iyang gisundan, kini nisakay sa usa ka sakyanan. Padayon siyang nisunod sa sakyanan.

Didto niya nakita nga nanulod ang duha sa pension house busa nangayo dayon siya og police assistance.

“Nangayo man daw niyag pasaylo iyang asawa pero wala dawata. Di daw niya mapasaylo, gipasakan gyud og kasong adultery,” sumala ni Baroman.

Ang seaman nipasaka og kasong adultery batok sa iyang asawa ug retired fireman.

Ang fireman nakapiyansa og P36,000 hinungdan nga na-release sa udto sa Miyerkules ug nianang hapon, ang asawa nakapiyansa usab sa samang kantidad alang sa temporaryong kagawasan. /