WALA madala sa luhod-luhod sa asawa ang iyang bana nga nakasakop kaniya nga nagkabayo sa iyang kabit niadtong Dominggo sa buntag, gipasakaan siya og kasong adultery sa Lunes sa buntag, Agusto 9, 2021, sa piskaliya sa dakbayan sa Talisay.

Ang 47-anyos nga bana nakahukom sa pagpasaka og kasong adultery batok sa iyang asawa nga 41- anyos ug 46 anyos nga construction worker human nisuporta kaniya ang ilang tulo ka menor nga mga anak.

Si Police Corporal Eleazar Belciña, imbestigador sa Talisay City Police Station nga nahinabi sa Superbalita Cebu, nagkanayon ang bana mipadayag nga hugot na ang iyang baruganan pagpasaka og kaso.

Ang asawa nagpunay og hangyo sa bana nga pasayluon siya sa iyang nahimo, naghilak kay nagbasol na siya sa iyang malaw-ay nga binuhatan.

“Sa police station naggakos-gakos, nagluhod ang asawa ngadto sa bana. Nagbakho, nanghangyo nga dili idayon ang kaso. Wala magpadala sa drama ang bana, nadala gyud sa piskaliya (ang asawa), nagminatay’g hilak,” paghulagway ni Belciña.

Ang bana mipadayag nga sirado na ang iyang hukom, ang iyang tulo ka mga anak nangusog sab nga pasakaag kaso ang ilang inahan.

Gipadayag sa bana nga napuno na siya, dili na niya maantos ang kanunay nga pagpabadlong sa iyang asawa.

Di kini unang higayon nga iyang nasakpan ang iyang asawa nga dunay laing lalake nga gikabuangan.

Niadtong Dominggo sa buntag, Agusto 8, 2021, nananghid ang asawa nga mosimba sa Mabolo, Dakbayan sa Sugbo.

Nahibulong ang bana nga di man unta hinimba ang iyang asawa ug nganong sa Dakbayan sa Sugbo nga naa may mas duol nga simbahan sa Talisay kay taga Lower Barangay Candulawan, Dakbayan sa Talisay sila gapuyo.

Niini, nagduda na ang bana sa iyang asawa hinungdan nga iyang gisundan uban sa ilang silingan.

Didto nasundan nila sa usa ka motel nga nisulod sa usa ka lawak ug naabtan sa bana, mga tanod ug pulis nga nagkabayo nga hubo ang tibuok lawas uban sa kabit sulod sa motel sa Brgy. Tabunok.

Ang duha pabiling gibilanggo sa Talisay City Police Station.