GITAMBAGAN ang taga isla sa Olango, dakbayan sa Lapu-Lapu nga di lang una molabang sa mainland Lapu-Lapu o mobiyahe paingon ngadto sa isla samtang naghulga ang dautang panahon gumikan sa Bagyong Ompong.

Samtang disaster team sa Lapu-Lapu gipakatap ngadto sa mga barangay nga flood prone, samtang declogger tank ang on-stand by na sab aron sa pagsuyop sa tubig-uwan sa mga area nga baha-an.

Si Mayor Paz Radaza mipahinumdum sab ngadto sa mga mananagat nga di lang una managat o mamasol sa kalabaka nga dagko ang bawod.

Ang buhatan sa City Disaster Risk Reduction Management Office ang alerto na sab sa dautang epekto sa maong katalagman.

Si Basak, Lapu-Lapu barangay kapitan Isabelito Darnayla kansang barangay maoy usa sa makasinati og grabeng baha sa higayon nga adunay pagbunok sa uwan mipahibawo nga ang covered court sa barangay ug tunghaan sa ilang dapit ang gi-andam nga magsilbing evacuation center.

Iyang gitug-an nga sukad pa kaniadto nga dipa improve ang siyudad sanapan sa baha ang ilang area gumikan porma sa yuta nga lupa samotan pa nga daghan nang areas ang sementado ug nagpusotpusot nga katukoran sa concrete establishment nga way kaagian ang tubig uwan.

Dugangan pa sab sa inawas gikan sa Mactan Cebu International Airport diin ang tubig uwan mokanaog gikan sa lapad nga runway og paingon sa iyang barangay.

“Molunop gyud ko (Basak). Mahal man pud nang declogger tank dili ka-afford ang barangay ana,” butyag ni Darnayla.

Ang Basak usa na sa mga suki nga barangay nga mohuwam sa declogger tank sa city hall. Devorah Taneo - USJ-R Intern