PATAY ang top 4 most wanted sa dakbayan sa Talisay human kini giingong misukol sa kapulisan atol sa pag-serve unta sa duha ka warrant niini niadtong Dominggo sa kaadlawon, Abril 14, sa Sitio Lawis, Barangay Maghaway.

Ang napatay mao si Jackson Bonghanoy Segundino, 35, kinsa nagpuyo sa maong dapit.

Pasado ala 1:00 sa kaadlawon dihang g-iserve sa kapulisan ang warrant batok sa suspek nga aduna’y kasong murder.

Ang maong warrant giisyu ni Glenda Go, ang presiding judge sa Regional Trial Court Branch 65 sa dakbayan sa Talisay ug ni Ma. Lynna Adviento, presiding judge sa RTC Branch 58 sa Cebu City.

Nasayran nga atol sa pag-serve sa warrant, nibunot og armas si Segundino apan naunhan kini sa kapulisan.

Si Segundino usa ka notado nga gun-for-hire ug drug personality. Siya usab ang suspek sa pagpatay kang Rogelio Paradio, 42, ang treasurer sa Barangay Lawaan, kinsa gipatay niini niadtong 2018.

Nakuha sa crime scene ang usa ka kalibre .38 nga revolver ug mga bala. (B)