USA ka job order (JO) worker sa Cebu City Hall patay human iyang motorsiklo nibanga sa Ceres Bus sa national highway sa Sitio Atabay, Barangay Macaas, lungsod sa Catmon, alas 6:10 sa buntag, Martes, Marso 22.

Ang biktima giilang si Jonrel Pautan Lacson, 40, minyo, taga Barangay Kantubaon, lungsod sa Tabuelan.

Samtang, gitanggong si Roger Pahid Sollano, 46, minyo, drayber sa Ceres Bus, taga Barangay San Antonio, dakbayan sa Bogo.

Si Police Corporal Mendel Orevillo, sa Catmon Police Station nga nahinabi sa Superbalita Cebu, nagkanayon nga ang biktima sakay sa iyang Suzuki Smash 115 motorsiklo padulong mo-duty sa dakbayan sa Sugbo.

Gikasugat niya ang Ceres bus nga gimaniho ni Sollano nga gikan sa dakbayan sa Mandaue paingon sa Norte sa probinsiya sa Sugbo.

Matud ni Orevillo, ang drayber nibutyag nga nakugang siya dihang kalit nga nibutho sa atubangan si Sollano.

Sumala pa ni Orevillo nga ni-overtake si Lacson sa duha ka wing van ug mini bus, apan nikawat kini sa karsada busa diha na niagi sa right lane ug gikasugat ang bus.

Tungod sa ka kalit, ka kusog sa impact mipilit sa atubangan sa bus ang motorsiklo.

“Kusog kaayo ang pagpadagan sa biktima, ang driver sa Ceres bus mibutyag nga dali niyang gi-full brake, unya iyang gilihay pero nilugapak sa atubangan,” dugang ni Orevillo.

Sumala niini nga tungod sa kakusog, nalabay si Lacson ug nakaangkon og grabing kadaot sa iyang lawas bisan nag-helmet.

Ang biktima gidala sa tambalanan sa lungsod sa Sogod apan pagka-alas 8:00 sa buntag sa samang adlaw namatay.