Mekaniko patay human nagpakusog og dagan sa iyang motorsiklo ug nilahos sa dagat sa pantalan sa Barangay Poblacion, lungsod sa Dalaguete, alas 5:10 sa buntag kagahapon, Agusto 7, 2022.

Si Roselito Villafor, 48, minyo, ug taga Barangay Bogo, lungsod sa Argao, gikataho nga hubog.

Si Police Staff Sgt. Pablo Rellen Jr. sa Dalaguete Police Station, nagkanayon nga pwerting huboga ni Villaflor human nagbuntag og tagay sa ilimnong makahubog.

Ang mga higala ningbutyag nga nilakaw kini sakay sa iyang motorsiklo ug kusog kaayo nga nakapadagan.

Gumikan sa kahubog, wala makaliko sa iyang motorsiklo ug nilahos sa pantalan.

“Nagtimpasaw siya uban sa motorsiklo, gitabangan sa mga tawo unya kusog man ang sulog sa tubig, nalumos patay,” dugang ni Rellen.

Ang biktima gidala sa tambalanan apan nakabsan sa iyang kinabuhi.