KANANGA, Leyte -Drug personality nga naa sa drug list ni Presidente Rodrigo Duterte gipusil patay sa wa mailhing killer.

Kini nahitabo sa highway sakop sa Barangay Naghalin, ning lungsod, alas 3 sa kadlawon, Dominggo, Enero 19, 2020.

Giila ang biktima nga si Sonny Toms Cabahug, 35, dunay kapuyo, taga Barangay Montebello ning lungsod.

Base sa imbestigasyon sa kapulisan, gikan sa pista sa Barangay Sto. Niño si Cabahug uban sa iyang uyab nga si Erica.

Ang duha nagsakay og scooter gikan sa Sto. Niño pauli na unta sa Montebello.

Pag-abot sa lugar nga nahitaboan, usa ka sakyanan nga wa mahibaw-i ang color ug plaka, nakasunod ug girakrakan ang biktima.

Nakaangkon og samad pinusilan sa ulo si Cabahug samtang natagak sa creek ang uyab niini ug nakaangkon og bali sa paa.

Dugang sa imbestigasyon, bag-o lang nakagawas sa prisohan si Cabahug human masikop niadtong 2016 tungod sa ilegal nga drugas.

Gisulti ni Police Major Ariel Salarda, hepe sa Kananga Police Station, nga naa sa listahan ni Presidente Duterte si Cabahug.

Daghan nga mga salapi ug automated teller machine (ATM) ang narekober sa crime scene ug basiyo sa taas nga kalibre sa armas.

Sa miaging Disyembre, gideklarar nga drug cleared ang lungsod sa Kananga.