Usa ka 26-anyos nga lalaki nga naaksidente sa kadalanan nadakpan na hinuon human nadiskubrehan sa mga pulis ang usa ka sachet sa shabu ug mga drug paraphernalia sa u-box compartment sa iyang motorsiklo sa lungsod sa Compostela, amihanang Sugbo niadtong Sabado sa buntag, Septiyembre 3, 2022.

Si Lieutenant Andrew Rellanos, officer-in-charge sa Compostela Police Station, niila sa suspek nga si Jesriel Autencio, taga Barangay Catarman, lungsod sa Lilo-an.

Si Rellanos niingon nga si Autencio nagmaneho sa iyang itom nga Honda Beat nga motorsiklo (ND 56485) paingon sa dakbayan sa Danao dihang aksidenteng nabanggaan ang usa ka Fortunato Rosal, 62, kinsa nagbarog kilid sa national highway sa Barangay Canamucan, Compostela mga alas 6:30 sa buntag.

Sila si Autencio ug Rosal nakaangkog mga samad ug gidala sila sa Danao District hospital ug anaa na sa maayong kahimtang.

Si Autencio, kinsa wala mag-helmet, swerteng naluwas sa pagkahulog ug bisan sa pagkabunal sa iyang ulo sa semento. Nadiskubrehan sa mirespondeng mga pulis ang ilegal nga drugas dihang ilang giablihan ang compartment sa motorsiklo ni Autencio.

Ang suspek gitanggong karon sa Compostela Police Station ug mag-atubang og kasong reckless imprudence resulting to damage to property and physical injuries ug sa paglapas sa Republic Act 9165 o Comprehensive Dangerous Drugs Act of 2002.