DRAYBER sa pick-up truck nga nadisgrasya sa Cebu South Coastal Road sa Siyudad sa Talisay human nilihay nga mabangga sa fuel tanker napriso hinuon human nasakpan nga ilegal nga gibiyahe ang kargang mga butane canister.

Nakatampo sa grabe nga paghuot sa trapiko sa Miyerkules sa hapon, Oktubre 16, ang nagpasad nga butane canisters human malimbuwad ang gikargahan nga truck.

Glikayan unta niini ang gisundan nga fuel tanker nga nibangga sa center island diha sa SRP sa barangay Cansojong, dakbayan sa Talisay.

Si Mario Cuizon, uban pa ang truckboy, Jimmy Blanco, way swerte kay napriso na hinuon sa Talisay City detention cell tungod sa kalapasan sa Presidential Decree (PD) 1865 o Illegal Trading of Petroleum Products.

Matod ni Police Patrolman Kim John Amolo, imbestigador sa Lawaan Community police precinct, nga sa dihang gipangayuan og permit ang duha sa pag-transport sa mga loaded nga butane, wa silay napakita.

Adunay 200 ka sako sa mga butane, o 1,500 ka butane canisters ang karga niini. (FMD)