CELLULAR phone nga gi-charge nga mibuto maoy nakaingon sa sunog nga miugdaw alas 5:45 sa buntag sa Biyernes, Septiyembre 17,2021 sa Purok Sunflower, Barangay Biasong, Dakbayan sa Talisay.

Igo nalang nakahilak si ginang Raymunda Abrea, 50, nga nagsud-ong sa iyang naugdaw nga balay.

Si Fire Officer 1 Renzon Fier, imbistigador sa Talisay City Fire Station, nga nahinabi sa mga tigbalita, nibutyag nga paspas kaayo ang kayo nga milamoy sa panimalay ni Abrea.

Si Abrea nibutyag nga nanglaba siya niadtong higayuna dihang kalit nga dunay sipang buto.

Human sa buto, midilaab gilayon ang iyang balay.

Gibutyag niya nga dako iyang pagtuo nga ang selpon nga gi-charge didto sa ilang lawak nibuto ug maoy nakaingon sa sunog.

Nagpasalamat hinuon si Fier kay dali sab nilang napawong ang kayo, wala makakatap sa mga silingan nga balay ingon man walay nangaangol. (GPL)