NASIKOP sa mga sakop sa City Intelligence Unit CIU sa Lapu-Lapu City Police Office (LCPO) ang usa ka 31-anyos nga negosyante human giingong namaligya kini ug overprice nga mga thermal guns ug thermometer.

Ang dinakpan nailhang si John Michael Abuton, molupyo sa usa ka subdivision sa Barangay Agus, Lapu-Lapu.

Nakuha sa posisyon ni Abuton ang moabot sa 12 ka mga non-contact thermal guns ug 10 ka digital fiber thermoter ug P5,000 nga buy-bust money sa kapulisan.

Mosumada ang nasakmit nga mga thermometer sa mga dinakpan ug P60,000 cash.

Matod ni Police Lieutenant Colonel Mark Gifter Sucalit ang hepe sa CIU nga nakadawat sila ug reklamo kalabot sa pagpamaligya ni Abuton ug mahal nga mga thermometer sa online apan personal ang bayranay.

Tuod man natigayon ang operasyon sa kapulisan ug napalitan gayud ang dinakpan.

“Daghan-daghan ni ug kaso violation sa Price Act, Food and Drug Authority FDA Act ug Consumer Act so prior sa operation naa gyud tay coordination sa FDA dili gyud ni bara-bara nga operation gibuild-up nato through sa informant ug intel monitoring,” pagpasabot ni Sucalit.

Apan si Abuton sa iyang bahin mihimakak nga overprice ang iyang gibaligyang mga thermometer.

Sumala pa niya alkanse gani siya sa iyang baligya sanglit napalit kini niya ug P6,500 sa dakbayan sa Mandaue ug ibaligya lang niya ug P4,900 o P4,600.

Gawas pa niini kuhaan pa usab kini ug tax sumala pa ni Abuton.

Ang maong presyo tabang na unta sa mga gusto mamalit pangangkon ni Abuton apan pag-atubang na hinuon ug kasong overpricing ang iyang nadangatan.

Iya na lang matod ni gidawat ang iyang nadangatan apan pabiling nakapangutana nganong overprice ang iyang baligya.

“Medyo ano na lang okay lang ganun talaga eh kung overprice tayo tanggapin natin yung parusa pero sa mga tao kayo po ang nakakaalam paki check sa online lahat mga seller sa Manila nasa P3,000 something na sila papupuntahin pa nang Cebu magbabayad ka ng Palco”, pagpasabot ni Abuton. (GCM)