ARON mobalik lang sa ilang pamilya ang iyang asawa, naghikog-patay ang usa ka tricycle driver. Ang insidente nahitabo sa Barangay Bunga, Cabucgayan, Biliran, alas 3 sa hapon, Martes, Abril 6, 2021.

Giila ang namatay nga si Jimmy Hongoy, 36, minyo ug usa ka tricycle driver.

Base sa imbestigasyon, ang 9 anyos nga anak ni Hongoy ang milili kini sa gamayng buho sa ilang kwarto ug nakit-an ang ilang amahan nga nagbitay na.

Wala kini maka-report pagdali gumikan sa kahadlok ug kakulba sa iyang nasaksihan.

Alas 7 sa gabii, nangabot ang ubang anak niini nga babaye ug gituktok ang kwarto sa ilang ginikanan apan walay niabli.

Gisaka sa anak nga lalake ang kisame ug didto nakit-an ang nagbitay nga patayng lawas sa ilang amahan.

Gibadbad sa anak ang gigamit nga pisi ug nangayo og pakitabang sa ilang mga silingan.

Dugang pa sa imbestigasyon, nisugilon ang kamaguwangan niining anak nga babaye nga nianang udto nagkaestoryahay siya sa iyang amahan.

Matod sa anak, nisulti ang ilang amahan nga dili na mobalik sa ilang pamilya ang inahan kon buhi pa kini (amahan).

Pipila ka oras ang nakalabay, napalgan nalang nila nga walay kinabuhi ang amahan ug nakita sa kapulisan nga depression ug problema sa pamilya ang hinungdan sa pagpakamatay niini.

Walay nakita nga foul play ang kapulisan sa kamatayon sa biktima samtang padayun pa ang imbestigasyon. (JKDP)