Nagpakamatay ang usa ka ulitawo human giindyan sa uyab atol sa iyang birthday party nga iyang gipangandaman.

Labing sakit pa kay iyang nahibaw-an nga ang babaye giingong duna nay laing gihigugma.

Alas 7:00 sa buntag sa Biyernes, Oktubre 15, nakit-an ang lawas ni Lord Carlo Tequiro, 25, nga nagbitay sa punoan sa mangrove sa Purok Saluyot, Brgy. Catarman, lungsod sa Liloan, amihanang Sugbo.

Si Police Senior Master Sgt. Arnie Goc-ong sa Liloan Police Station nga nahinabi sa Superbalita Cebu nagkanayon nga naguol si Tequero base sa ilang nakuhang impormasyon gikan sa kabanay.

Sumala pa ni Goc-ong nga wala makadawat si Tequero nga ang iyang uyab duna diay laing gikarelasyon.

Nagsugod ang kadismaya ni Tequero kay niadtong Oktubre 4 nag-selebrar siya sa iyang birthday.

Iyang gipaabot nga ang iyang uyab maoy mag-una niyang bisita, apan “namuti na lang ang mga mata” og pinaagi, wa kini motunga.

Giingong daghang rason ang babaye kon nganong wala makatunga sa iyang birthday.

“Taas na kaayo siyag expectation, Sir. Pinangga daw kaayo ang uyab. Naghikay siya unya na unsa man gi-indiyan sa babaye. Nahibaw-an niya dunay laing gika-date,” dugang ni Goc-ong.

Si Tequero gihulagway nga seryoso nga pagkatawo, gani inspIrasyon niya ang uyab sa pag-training sa Bureau of Jail Management and Penology (BJMP).

Apan natunaw ang tanan atol sa iyang birthday kay laing lalake ang giingong gikuyogan niini. (GPL)