NAMATAY ang drayber sa motorsiklo human kini nalatayan sa usa ka truck tractor sa dan M.C. Briones, Barangay Basak, Mandaue City alas 10:45 sa buntag sa Biyernes, Hunyo 26, 2020.

Giila ang namatay nga si Fransisco Casinello Maquilan, 46, minyo, taga P.Sanchez St., Sector 6, Barangay Pagsabungan, Mandaue City.

Sa gi-post nga CCTV footage sa Traffic Enforcement Agency of Mandaue (Team) sa ilang Facebook page, makita nga gikan si Maquilan sa lane kilid sa sidewalk.

Tungod sa kahuot, siya mibalhin sa pikas lane nga dapit sa tunga.

Sa maong lane nagdagan ang tractor truck nga gimaneho ni Junrey Danlag Morales, 35, minyo, taga Purok Saging, Dao Cotcot, Lilo-an, Cebu.

Sa pagbalhin ni Maquilin sa pikas lane, nadumbolan sa truck tractor ang luyo sa motorsiklo hinungdan sa iyang pagkalumba.

Sa pagkatumba niini, padayon gihapon sa pagdagan si Morales sa truck ug didto na nalatayan sa tuong ligid si Maquilin ug iyang motorsiklo.

Gituohang wa dayon makabantay si Morales kang Maquilan tungod sa kakalit sa pagbalhin sa pikas lane.

Si Maquilan namatay diha-diha.

Daling miresponde ang ambulansya, kawani sa Team ug ang Traffic Group sa Mandaue City Police Office (MCPO) sa maong dapit.

Sa inisyal nga imbestigasyon sa kapulisan, gibutyag niini nga ang hinungdan sa aksidente “human error”.

Si Morales temporaryong gipriso ubos sa kustodiya sa MCPO Headquarters Holding Facility. (KFD)