Wala na naporma ang lawas sa usa ka lalake human nga nalatayan sa usa ka dumptruck nga mo-overtake unta niini sa may tiilan sa Marcelo Fernan Bridge sa U.N. Avenue, Barangay Umapad, Mandaue City ala 1:35 sa hapon sa Sabado, Oktubre 16, 2021.

Giila ang biktima nga si Rody Amistad, 52, minyo, taga Barangay Abuno, Lapu-Lapu City.

Samtang, giila ang drayber sa dumptruck nga si Aldwin Hermosilla, 49, taga Carcar City, habagatang Sugbo.

Matod ni Police Lieutenant Lt. Colonel Eloveo Marquez, tigpamaba sa Mandaue City Police Office (MCPO) nga base sa kuha sa closed circuit television (CCTV) camera sa lugar, nakita nga nag-una si Amistad sakay sa iyang motor. Nagsunod ang dumptruck nga gimaneho ni Hermosilla.Ang duha paingon sa Lapu-Lapu City.

Pag-abot sa may tiilan sa Marcelo Fernan Bridge paingon saka sa taytayan, ni-overtake si Hermosilla ug nadumbolan si Amistad.

Nawad-an og balanse si Amistad hinungdan nga natumba ngadto sa ikaduhang ligid sa dumptruck ug nalatayan siya.

Girespondehan kini sa MCPO Traffic Group diin gidala nila si Hermosilla sa ilang kustodiya.

Samtang, ang lawas ni Amistad gidala sa Mandaue City Hospital bisan kon kini wa na maporma ug gikan didto gihatod sa punerarya.

Matod ni Marquez nga wala pa silay nadawat nga bisan unsang feedback gikan sa kabanay ni Amistad.

Sigon ni Marquez nga kon dili makig-settle ang pamilya ni Amistad, posibleng kasohan og reckless driving resulting to homicide and damage to property ang atubangon ni Amistad.

NABANGGA