WALA na mahinayon sa pagmuntar og CCTV camera ang usa ka 19 anyos nga lalake sa usa ka edipisyo sa Osmeña Blvd. eskina dan Legaspi extention sa Dakbayan sa Sugbo human nakuryentihan kagahapon, Marso 5.

Si Police Major Edgar Labe, hepe sa Waterfront Police Station 3 sa Cebu City Police Office (CCPO), niila sa biktima nga Marvin Ayuno, 19, molupyo sa Barangay Paknaan, Dakbayan sa Mandaue.

Si Ayuno usa ka trabahante sa Protocol Surveillance Solutions sa Barangay Pagsabungan sa Mandaue isip tig-install sa CCTV camera nga ilang makontrata.

Apan aksidente nga nakuryentehan sa ibabaw sa poste sa Visayas Electric Company samtang nangita og nindot nga anggulo nga plastada sa maong CCTV camera.

Matod ni Labe nga subay sa ilang pakisusi, si Ayuno nakasuot og ekipo alang sa safety measures sama sa safety belt.

Apan niadtong tungora, sumala sa Labe, wala mabantayi ni Ayuno nga ang suot niining safety belt mitapot didto sa live wire hinungdan nga nagkuryentihan kini.

Ang mga sakop sa Cebu City Fire Station ug City Disaster Risk Reduction Management Office (CDRRMO) ingon man ang ambulansiya gikan sa Cebu City Emergency Medical Services daling ningtubag sa alarma.

Si Ayuno ilang gidala sa Cebu City Medical Center (CCMC).

Nasuta sa SSuperbalita Cebu nga si Ayuno luwas na sa makuyaw nga kahimtang sa pagkakaron apan nagpaalim sa iyang mga paso sa lawas sulod sa CCMC.(BBT)