DAKONG tindahan sa dalan Calderon, Barangay Ermita, Siyudad sa Sugbo, gironda sa mga sakop sa Regional Civil Security Unit sa Police Regional Office 7 inabagan sa Carbon Police Station ug City Intelligence Branch (CIB) sa Cebu City Police Office tungod sa pagpamaligya sa illegal nga pabuto.

Ang gironda mao ang Cebu Jcal Marketing nga giingong gipanag-iya sa usa ka Jenny Gabiana Calipayan.

Moabot ngadto sa P323,120 ang balor sa illegal nga pabuto nga nasakmit sa kapulisan.

Matod ni Police Captain Alvin Llamedo, hepe sa Carbon Police Station, ang Camp Crame ang nakadawat og reklamo sa pagpamaligyag illegal nga mga pabuto sa tindahan. Ang reklamo gipasa sa PRO-7 ug sa RCSU nga maoy opisina sa PNP nga gitahasan sa pag-regulate sa pagpamaligya og pabuto ning panahon sa Pasko ug Bag-ong Tuig.

Gipanid-an sa RCSU-7 ug Carbon Police Station ang tindahan ug mipalit pa silag pabuto.

Niadtong Biyernes sa alas 5 sa hapon, Disyembre 27, human mapalitan ang tindahan, gipahibawo dayon nila ang management nga sila mga pulis ug ang ilang pagpaninda sa mga pabuto kalapasan sa balaod.

Matod ni Llamedo nga adunay firecracker zone nga didto ra gitugot makabaligya sa mga legal nga pabuto. Sa inspection, nasuta nga ang gipamaligya nga pabuto illegal usab.

“Base sa information nga gihatag sa taga RCSU, illegal gyud daw nang mga pabutoha. Lesson learned ni sa mga namaligyag pabuto nga dili sa firecracker zone kay unang una, illegal na siya. Nya ang ikaduha, ang ilang mga pabuto illegal pud, ”matod ni Llamedo.

Gikatakdang bas-on sa PRO-7 sa pagpangulo ni Police Brigadier General Valeriano de Leon ang mga pabuto dungan sa mando nga monitoron ang ilegal nga naninda niini sa bisan asang dapit sa Metro Cebu.