Sa higayon nga adunay ipatuman nga mga proyekto, programa o polisiya sa mga ahensya sa nasudnong kagamhanan ug government-owned and controlled corporations (GOCCs), gikinahanglan na kini mananghid una sa Kapitolyo.

Kon magdumili sa pagsanong, makamulta o kasilotan ubos sa balaod.

Mao kini ang nalatid sa gipalabang nga Provincial Ordinance No. 2023-02 sa Hunta Probinsyal sa Lunes, Abril 4, 2023 atol sa regular session niini.

Ang ordinansa pinasubay sa probisyon sa RA 7160 o Local Government Code of 1991 nga nagtugot sa pagpahamtang og tukmang silot ngadto sa mga molapas sa lagda.

Si PB committee on laws ug first district Board Member Raul Bacaltos maoy nangamahan sa ordinansa nga “inimical act” o sumpaki sa General Welfare Act, paglikay sa national line agencies ug GOCCs sa pagpananghid sa Kapitolyo.

Gihimug-atan usab ni Bacaltos ang unod sa ordinansa subay sa Sections 2(c), 25(b), 26 ug 27 sa Republic Act No. 7160 nga nagmando sa tanang national line agencies ug GOCCs nga mo “coordinate, consult and involve the Province of Cebu in the planning and implementation.”

Subay niini, ang mga ahensya gikinahanglan na nga mosumiter og kompletong dokumento may labot sa programa, proyekto ug polisiya nga ipatuman aron makahimo og pagtuon ug panagsabot ang duha ka mga habig.

Ang mosupak niini pamultahon og P5,000 o pagkapriso og di momenos usa ka tuig.

Si Cebu Governor Gwendolyn Garcia una nang niinsister sa katungod sa Kagamhanan sa Probinsya sa pagsusi o pagkahibaw daan sa mga lagda ug planong gustong ipatuman sa mga ahensya ubos sa Local Government Code.